2Ti 4 | AOJFILIFITA | STEP | Anona nemaf Jisas Krais nowaloga epes hiesi deiꞋ ataꞋ sape namisi, soloma isima sagaꞋi wapotiꞋ. Naep Godi maloma Krais Jisasi deiꞋ aꞋipina basef laꞋifimi aꞋi Krais Jisas anona nemaf notaga nondawalap alihina naep epes hiesi eaꞋ nope Dembinai wambel Ananinai. Amama atom deiꞋ aꞋipina mehip,

2 Timothy 4

IneꞋ newalapa basef Godi endilisi

1 Anona nemaf Jisas Krais nowaloga epes hiesi deiꞋ ataꞋ sape namisi, soloma isima sagaꞋi wapotiꞋ. Naep Godi maloma Krais Jisasi deiꞋ aꞋipina basef laꞋifimi aꞋi Krais Jisas anona nemaf notaga nondawalap alihina naep epes hiesi eaꞋ nope Dembinai wambel Ananinai. Amama atom deiꞋ aꞋipina mehip, 2 ineꞋ niꞋipasa basef Godi laꞋelaꞋef. Nemaf anama esis sondandombam ma someꞋ basef, niꞋipasam. EaꞋ maina nemaf esis sandaiwaꞋ ma someꞋam, niꞋipasam etin. NiꞋipasam ma mohagofa basef amama basoꞋmaimi. NiꞋipasa basef laꞋifimi ma sokwaha waf aonai esis sandaꞋanai. EaꞋ nefela ukup asasimi nendaꞋas sotaga laꞋifisa baleꞋef, niwalipasa waf aonai nendaꞋas soꞋusoꞋumbemas. Niwalipasa basef amama siꞋi okom Godi naꞋiami. 3 Anona nemaf notaga, esis sondaiwaꞋma sofaꞋ basef buꞋwami Godi, owaꞋ. EaꞋ sila ukup asasimi atom sofaꞋai anom tisa hiami asasimi, ma miꞋipasa basef amama esis isima ukup maimaila someꞋam aligah asasimi. 4 EaꞋ sowaꞋ alafugaha basef endilisimi semeꞋ basef amama mamumami falafumi wafimi. 5 EaꞋ ineꞋ laꞋelaꞋef okom nopeina andeandeꞋ nimafi alop ineꞋinai andeandeꞋ. Nemaf anama nimanimi motagamena nepe laꞋifina nendaꞋ maol Godi newalapa basef buꞋwami ma esis amam nematawa sololama Godi. NendaꞋ maol anama ma nigiambamas nendaꞋana endilisi nimbefana.

Pol naꞋi, “DeiꞋ maol aeꞋanai naꞋi hiꞋilana.”

6 IneꞋ negawa, nogota anama nataga eaꞋ ma sehe egaꞋ. Esimbel aeꞋami maꞋi koloꞋolam molo sehe egaꞋ ma indilali esoꞋ aeꞋ efeꞋma God. Nemaf nataga ma aeꞋ ekwaha etap anaeꞋ. 7 AeꞋ fowaꞋ andondombam asagih andeandeꞋ. AeꞋ embaleꞋefa Krais laꞋifiwi asagih andeandeꞋ, deiꞋ ataga ikwaf. 8 DeiꞋ amamaga amama buꞋwami sasagih sikilaꞋi sefaꞋami sandandombam maꞋome. Amama naꞋama. Nambimb Dembinai nofale niꞋipi niꞋi, “IneꞋ aman buꞋwinai.”

Dembinai anan aman buꞋunai nowalogas ma nemaf anama. Nemaf anama luꞋunai Anan neseꞋe amamaga amama buꞋwami. EaꞋ ina nosoꞋ aeꞋ atowe, owaꞋ. Anan noseꞋasam emi egafis ukup maimaila Anan notaga nondawalap sotolona.

Anom basef tuꞋwanim

9 DeiꞋ ineꞋ nifiꞋmai aeꞋ mehip. 10 DeiꞋ main, Demas okom naꞋinaꞋi waf aonai etapanai eaꞋ nakwahowe nafeꞋ Tesalonaika. Kresens nafeꞋ etap hiagoma Galesia, eaꞋ Taitus nafeꞋ etap hiagoma Dalmesia. 11 DeiꞋ Luk atona nape nalome. IneꞋ neꞋwa Mak nolomena nifiꞋi nehaponameana. DeiꞋ main, andeandeꞋma anan nigiambame ma maol Godi. 12 AeꞋ asapaꞋ Tikikus nafeꞋ Efesus. 13 IneꞋ nifiꞋi nifaꞋmai saket anama launai anama akwahona naꞋihi Troas ipat Karpusi. Anama ineꞋ nifaꞋmianai nifiꞋi. EaꞋ anom buk aeꞋami wapotiꞋ nifaꞋmiami. Buk amama sandaꞋ agwafuh mafisim sandaꞋami. Amama nifaꞋmiam etin nifiꞋi endilisi.

14 Aleksander aman nandaꞋ maola brasi, nandaꞋ megah endilisi. Anona nemaf Dembinai nogwamana nimanimi anan, mondahama waf anan nandaꞋmeanai. 15 IneꞋ wapotiꞋ nindumafuma ma aman anama. Anan nahogofa basef amama afeꞋimi endilisi.

16 AliꞋ agwa basefa kot anama esis sandaꞋmeanai, ina enin epen etitin naitu nalome nemaf anama nagiambame, owaꞋ. Epes aeꞋasi hiesi sakwahowe. EaꞋ andaꞋ betena God naꞋama, aꞋi ina okom nopoma waf anama aonai esis sandaꞋanai ma sakwahowe nemaf anama andaꞋ kotanai, owaꞋ. 17 EaꞋ Dembinai numafi aeꞋ ape naseꞋe pepel. Amama atom deiꞋ awalapa basef buꞋwami aꞋiam laꞋifiwi endilisi eaꞋ epes isima hiesi owaꞋ Judaisi sogawa basef Godi, deiꞋ sameꞋam hiꞋalas. EaꞋ God nagiambame ma malogel mafin anama luꞋunai laion. 18 Anona nemaf Dembinai nigiambame ma waf anama aonai hianai esis sandaꞋmianai, eaꞋ nofaꞋe etanima nohapone epe wambel Ananinai gani ilif heven. AeꞋ aꞋi pepel howalagon nopaina laꞋelaꞋef. Endilisi.

19 IneꞋ neseꞋago danifel aeꞋanai ma Akwila naloma Prisila eaꞋ esis isima wambota Onesiforusi. 20 Erastus ataꞋ napani etin Korin. EaꞋ Trofimus awes nandaꞋana akwahona napani Miletus. 21 IneꞋ nifiꞋi mehip. NaꞋama ineꞋ nepomai nemaf anama uf luꞋunai naluwanai. Yubulus naloma Pudens, Linus naloma Klodia naloma esis alupusi Kristen isima hiesi sandaꞋmenago danifel ma ineꞋ. 22 AeꞋ aꞋi Dembinai nope nolomago ambal buꞋunai ineꞋinai nigiambamepa naꞋa. EaꞋ maꞋum.